Intercambio

     Este curso iniciamos un fermoso proxecto coas nosas colegas do IES Eusebio da Guarda. Comezamos coñecéndonos a traves do correo electrónico para despois intercambiarmos diferentes actividades colaborativas. Primeiro propuxémoslles coñecer ditos e refráns sobre a Candeloria e respondéronnos con enredos sobre aves de Galicia; con isto aproveitamos para facer un traballo de investigación sobre as características desas aves e facerlles un vídeo expositivo que nos serviu como pretexto para aprendermos máis do contorno do noso centro posto que fixemos un roterio guiado desde Educación ambietal do concello.

    Nos últimos meses xa tiñamos ganas de nos coñecer fisicamente así que artellamos as visitas aos respectivos centros. Recibímolos no noso centro cos brazos abertos cunha actividade de unir partes das cantigas para que se coñecesen un pouco máis. Demos un paseo polo centro e na despedida agasalláronnos cun marcapáxinas personalizado.

    Unha semana despois fomos o seu centro e tratáronnos de marabilla. A visita guiada polas instalacións do centro foi fantástica, mesmo nos recibiu a directora. E aínda tiñan dúas sorpresas máis: un conxunto de comidas propias de cada un dos seus país (que rico estaba todo! Parabéns e moitísimas grazas!!!) e unha visita ao tellado do instituto para ver unha estampa da cidade non moi habitual pois foi un privilexio.

    Deixovos aquí un pequeno resumo da nosa visita e da marabillosa experiencia. Entre todas había máis de 10 nacionalidades diferentes. Viva a diversidade!! E esperamos ansiosas o próximo curso a ver se podemos seguir intercambiando experiencias.

Nesta ligazazón IES EUSEBIO DA GUARDA podedes ver a cariñosa entrada que nos dedican.

    Moitas grazas, compañeiras!!!!

Galego

 

Verbos irregulares, an interactive worksheet by beatrizrcruz
liveworksheets.com

Verbos galego 1ESO, an interactive worksheet by Beckygrape
liveworksheets.com

 Sujeto e predicado

 Completar verbos

Modalidades oracionales, an interactive worksheet by nagore
liveworksheets.com

REPASO PENDENTES

 Aquí tes un montón de recursos: https://www.testeando.es/2-ESO-Lengua-18

http://www.antonioviñuales.com/2o-eso-test-autoevaluacion/ 

Peace Barnabas, balonvolea (voleibol, vólei)

 

Ola! Somos Fran e Hugo e hoxe imos entrevistar a Peace Oviasogie Barnabas que practica voleibol.

1.- Cóntanos quen es ti?

Ola! Eu son Peace e curso 1º de bacharelato no IES Monte das Moas.

2.- En que consiste o teu deporte? Pertences a algún club?

Eu practico voleibol. Un deporte en equipo que require coordinación e comunicación entre as xogadoras do equipo. Consiste en que o balón non caia ao chan. Cada equipo ten 3 pases máximo cada vez que o balón entra no seu campo. Entre estes pases está: a recepción, a colocación, o remate e a defensa. Non se conta como pase o saque e o bloqueo das xogadoras dianteiras. Este deporte ten 3 sets de 25 puntos pero tes que gañar os 3 sets para gañar o partido; no caso que empate, realízase un cuarto set e ata un quinto (este último de 15 puntos). Entre cada set o equipo ten que cambiar de campo. Adoita haber 6 xogadoras no campo, pero xogan 7 (dependendo da categoría). As posicións principais das xogadoras son: colocadora, receptora, oposta, central e líbero (depende da categoría). Practico este deporte no Club de Voleibol Oleiros.

3.- Cando comezaches a practicar o voleibol? Onde adestras?

Comecei a practicar voleibol aos 14 anos e adestro en Oleiros, onde está o club.

4.- Por que escolliches o voleibol?

Por nada especial, gustábame, decidín probar e aquí sigo.

5.- Practicas algún outro deporte?

Non, non practico outro deporte.

6.- Como te preparas para a competición? Segues algunha rutina...

Normalmente, antes de comezar un partido, os equipos teñen 1 hora para quentar e facer as súas rutinas de quecemento. Nesa hora tamén se quentan pases, remates e saques. Persoalmente, escoito música antes de chegar ao pavillón e intento non pensar moito no partido porque sempre me poño moi nerviosa nos partidos.

7.- Tes algunha referente?

Si, as miñas referentes son Simeon Nikolov e Mya Allen.

8.- Que obxectivos tes para o futuro?

Para a miña categoría, o obxectivo é chegar ao Campionato de España, pero persoalmente, gustaríame clasificar para a Selección Española.

9.- Que consellos lle darías a alguén que quere comezar no atletismo? Recoméndalo?

Se vas comezar este deporte recomendo ter moita paciencia xa que é un deporte que necesita moita práctica. Recomendo o deporte porque axuda a fortalecer varias partes do corpo e é unha boa maneira de pasar o tempo, xa sexa cos teus amigos no parque ou cos compañeiros no equipo.

10.- Que beneficios ten facer voleibol?

Pois o que vos dixen, fortalece o corpo e é unha maneira fantástica de facer amigas e sobre todo equipo, pois somos un grande equipo.

            11.- Despedida 

Moitas grazas por me entrevistar.

Foliada no instituto

Hoxe 26 de maio festexamos as Letras Galegas cunha foliada. Canto nos prestou!!! Grazas Nati, Alberte, Xoel e Alberto por nos virdes acompañar. Viva o canto e o baile tradicional!!!!!

 

Intercambio co IES Eusebio da Guarda

 O pasado xoves 22 o alumnado do IES Eusebio da Garda veunos visitar. Fixémoslles un recibimento con cantigas, unha visita guiada polo noso centro e rematamos con intercambio de agasallos.

Unha visita moi interesante pois previamente fixemos intercambio de actividades e correos electrónicos. Estamos desexando devolverlles a visita. Que nervios!!!!

Visitamos a biblioteca do Castrillón

O pasado día 13 o Club de lectrua de PDC e o alumnado de Oratoria  tivemos un encontro na biblioteca do Castrillón con Paula Carballeira, un grupo de usuarias do Centro de  Día, o club de lectura Obxectivo Bibliotk e un grupo de alumnas do IES de Monelos.

Foi un encontro fantástico pois puidemos falar das lecturas realizadas, Trece avisos e As alumnas. Ademais co alumnado de Oratoria preparamos uns textos moi divertidos da súa obra de teatro Alicia & Alicia. As alumnas de Monelos cantaron uns cantigas tradicionais e rematamos cantando todas o Pasodobre de Laxoso. 

Deixo aquí un pequeno resumo do ben que o pasamos. Viva a literatura!!!!! Viva a oralidade!!!!

  

 
 

 

Muay Thai, Alicia Chamorro García

Somos Nicoll e Martín e imos entrevistar a Alicia, a nosa campioa do mundo:

1.- Cóntanos quen es ti?

Eu son Alicia Chamorro, unha rapazada de 16 anos da Coruña, que estuda primeiro de bacharelato no IES Monte das Moas.

2.- En que consiste o teu deporte? 

Adestro Muay Thai,. un deporte de contacto tailandés, boxeo tailandés, que consiste no combate de dous puxilistas nun ring. O que máis identifica este deporte é a diversidade de golpes que podes empregar para gañar: cóbados, xeonllos, patadas e puños, adeamis dun ritual chamado “As 4 esquinas” e outro chamado “Wai Kru” que é unha mostra de respecto ante o contrincante e o teu adestrador ou a túa adestradora.

3,- Pertences a algún club?

Formo parte do Club Iago Barros Fight Club, da Federación Galega de Kick boxing e Muay Thai e de dúas seleccións de diferentes ligas españolas de Muay Thai (WBC e ISKA).

4.- Cando comezaches a practicar o muay thai? Onde adestras?

Hai uns anos cambioume a vida por completo cando os meus pais decidiron apuntarme a un deporte de contacto para “aprender a defenderme”. Levo desde os 10 anos practicando este deporte, aínda que cando comecei a adestrar seriamente foi hai tres anos.

Adestro no Club Iago Barros.

5.- Como te preparas para a competición? 

Con moito esforzo. Dous adestramentos ao día, dietas e pouca vida social, que pode que sexa o máis complicado na miña idade.

6.- Como foi o proceso para ser campioa do mundo?

Catro veces campioa Mundial, foi todo un soño. Eu algo tiña claro, ía ser a mellor na miña categoría, e sabía que iso tiña moito traballo e esforzo detrás. Foi duro, tiven que compaxinar os estudos cos adestramentos, e ás veces o cansazo podía comigo, pero ao final todos os sacrificios teñen a súa recompensa. Pasei rondas e planteime na final contra Holanda, onde volvín saír vitoriosa pola vía do KO no segundo asalto. Sentíame nun soño, bicampioa mundial en dous meses e en dúas categorías diferentes. Aí, é onde me dei conta de que todos os adestramentos e sacrificios de tantos meses tiveran a súa recompensa. 

Foron meses moi difíciles, pero en xullo de 2024 volvín proclamarme campioa do Mundo ISKA. Despois de pasar todo o verán adestrando, en vez de ir á praia a diario e pasalo ben como a rapazada da miña idade, eu só ía ocasionalmente, xa que tiña un obxectvo en mente e non ía deixalo escapar. Subín de categoría a menos de 18 anos, onde era a máis pequena e volvín a proclamarme campioa Mundial WBC contra a campioa francesa número dous do ránking mundial nesa categoría. Acórdome perfectamente dos nervios, da presión e da responsabilidade que tiña encima, ía loitar contra unha top do ránking mundial, podía saír perdedora, pero acabei o combate como a gañadora.

7.- Por que escolliches o muay thai?

Do que máis me namorei deste deporte é do respecto e unión que hai nel. Ademais da disciplina e do sacrificio que tes que ter para poder conseguir logros.

8.- Como vas equipada para competir? Levas protección?

Levariamos luvas máis grandes, tibiais, cobadeiras, casco, protección bucal e íntima. Se es menor de 16 anos levarías tamén un peto. Na miña carreira deportiva sitúome en afeccionada, en menos de 18 anos e na categoría 48,9 quilogramos. Pola contra, fóra de España debutei en profesional, concretamente en Tailandia.

 9.- Cambiouche a vida o muay thai? Por que?

Desde que practico Muay Thai conseguín todos os meus logros, a miña vida cambioume por completo, teño que adestrar todos os días da semana e levar unha dieta equilibrada. Ademais, este deporte ensinoume o que verdadeiramente é ter unha segunda familia onde podes recorrer se necesitas axuda ou consellos e onde te sentes cómoda e querida.

10.- Que consellos lle darías a alguén que quere comezar neste deporte?

A calquera persoa que quere comezar a adestrar este deporte animaríaa, xa que aínda que parece agresivo a simple vista, é todo o contrario, ensínache compañeirismo, disciplina e respecto.

11.- Que beneficios ten?

Tamén é unha maneira de manter un estilo de vida saudable e activo. Son moitas as persoas que comezan neste deporte por iso, aínda que moitas outras, sobre todo rapazas, comezan a practicar este deporte como defensa persoal.

11.- Moitas grazas, Alicia, por atendernos e responder as nosas preguntas. Sorte e sigue colleitando triunfos.

Grazas a vós polo interese amosado. Vémonos!

 

 

Atletismo, Icía Ares Betanzos (marchadora)

Bo día, somos Naiara e Nadir e imos entrevistar a Icía, unha atleta con moita "marcha".

1.- Cóntanos quen es ti?

Eu son Icía Ares Betanzos, teño dezasete anos, estudo primeiro de bacharelato neste instituto e levo facendo deporte toda a miña vida.

2.- En que consiste o teu deporte? Pertences a algún club?

O meu deporte é o atletismo, un deporte individual onde compites en diferentes disciplinas como velocidade, resistencia, saltos, etc. En concreto a miña especializade é a marcha.

Eu pertenzo ao club Ourense Atletismo, o cal me fichou hai dúas tempadas.

3.- Cando comezaches a practicar o atletismo? Onde adestras?

Comecei a practicar o atletismo cando tiña 7 anos, aínda que xa dende máis pequena competía nas carreiras populares da cidade. Decidinme a practicar seriamente a marcha hai apenas dous ou tres anos, xa que antes practicaba outras disciplinas.

Adestro en Ordes e en Bertamiráns, xa que é alí é onde se atopan a miña adestradora e os meus compañeiros.

4.- Por que escolliches a marcha? Que diferenza hai entre marchar e correr?

Decidinme pola marcha xa que, despois de probar case todas as disciplinas, era a que mellor se me daba e na que nun futuro podería destacar moito máis. A marcha e correr non teñen nada que ver, á parte da velocidade e da forma de facela, o máis importante da marcha é a técnica, xa que se se realiza incorrectamente podes ser descualificada da competición. Na marcha por cada zancada, a perna debe atoparse completamente estirada o co pé entrando de calcaño; o pé de atrás non pode estar levantado antes de dar a seguinte zancada.

5.- Practicas algún outro deporte?

Si, tamén practico baloncesto dende hai 13 anos.

6.- Como te preparas para a competición? Segues algunha rutina...

Antes dunha competición importante sempre tento estar moi concentrada, quentar e mobilizarme ben para prever molestias ou lesións; aínda así eu teño máis que rutina, manías, como ter un calcetín de distinta cor, cear a noite de antes ou almorzar o día da competición comidas específicas, ter un dorsal de número impar... Todo isto dáme sorte.

7.- Que obxectivos tes para o futuro?

A curto prazo, nesta tempada busco lograr podio no campionato de España de aire libre en Castellón e tamén acadar a clasificación para ir ao campionato iberoamericano con selección española que se celebrará en Paraguay.

8.- Que consellos lle darías a alguén que quere comezar no atletismo? Recoméndalo?

Que goce moito, que faga moitos amigos nos adestramentos e nas competicións e que probe todas as disciplinas. É un deporte para divertirse e a pesar de ser individual séntese coma un deporte de equipo grazas a todas as amizades que fas. Recoméndoo moito.

9.- Que beneficios ten facer marcha?

Coma todos os deportes, ten beneficio físico para a nosa saúde. Ademais fomenta a resistencia tanto física como mental, xa que o atletismo é un deporte onde a cabeza e o máis importante.

10.- Grazas, Icía, por nos atender e responder as preguntas.

Moitas grazas a vós e espero que as miñas respostas axuden a que se interesen polo atletismo.

Dragon Boat, Noa Varela Guzmán

Somos Leo e Brithany e imos entrevistar a Noa Varela Guzmán que practica Dragon Boat.

1.- Cóntanos quen es ti.

Eu son Noa, teño 16 anos, estudo primeiro de bacharelato de ciencias e practico Dragon Boat como temoneira e monitora auxiliar.

2.- En que consiste o Dragon Boat?

O Dragon Boat é unha modalidade de piragüismo de orixe chinesa, trátase dunha modalidade de padeo unilateral, é dicir, só podes padexar por unha banda e outra compañeira encárgase do lado non ocupado. Os barcos poden ser ou de 12 ou de 22 persoas e están decorados cunha cabeza e cola de dragón; tamén conteñen: asentos para as padeeiras, un asento para a tambor, un tambor e un temón. As embarcacións están compostas por 10 ou 20 padeeiras (dependendo do barco ); unha tambor que se ocupa de marcar o ritmo; e unha temoneira que se encarga da dirección que toma o barco.

3.- Como xorde a idea de practicalo aquí na Coruña?

Neste caso o equipo do que formo parte é un grupo BCS, que son as siglas en inglés de Sobreviventes de Cancro de Mama. Hai un doutor aquí que tras varias viaxes soubo deste deporte e dos seus beneficios para as secuelas desta enfermidade, entón decidiu falar con outra doutora e conseguiron un barco e tiveron a idea de crear esta asociación cultural e deportiva sen ánimo de lucro para axudar a mellorar a calidade de vida de varias mulleres.

4.- Quen o pode practicar e onde?

Como xa dixen anteriormente o meu equipo é específico para BCS e nós adestramos na Mariña da Coruña, que está situada á beira da torre de control marítimo.

5.- Como empezaches ti a practicalo?

Eu empecei co fin de axudalas, explícome, este deporte é beneficioso para elas só no posto de padeeiras,como tambores ou temoneiras non gañan nada e por tanto decidiron buscar outra xente que poñer neses postos. Estes dous postos é mellor que sexan desempeñados por nenas debido a que pesan menos e son o que dicimos peso morto; as padeeiras padexan o seu propio peso, o do barco e o do tambor e temoneira, se estes dous son adultos é máis probable que pesen máis e sexa máis peso para mover. Entón pensaron en meter as fillas das distintas padeeiras. A miña nai explicoume a situación e díxome se me animaba e despois dunha pequena charla convenceume, empecei como tambor e co tempo fóronse unindo máis nenas e eu pasei a ser temoneira e auxiliar de monitora. Actualmente somos 6 nenas e 1 neno. 3 tambores: Aldara,Sabela e Sofía; 1 mozo que está adestrando para ser temoneiro: Carlos; 2 temoneiras: Clara e mais eu. Aínda que tamén temos o noso adestrador, Rodrigo, que pode ocupar calquera posto no barco á perfección.

6.- Canto tempo levas e participaches nalgunha competición xa?

A verdade non me acordo exactamente cando empecei pero levo máis ou menos 1 ano. E si, xa participamos en varias competicións, tanto a nivel galego como español, temos 1 ouro e 1 prata galegas e 1 prata española. Isto desde que eu estou no equipo pero teñen 1 bronce galego anterior á miña chegada. Temos algunha medalla máis pero son ou de festivais ou de copas e estes son considerados " non tan importantes", isto debido a que non contan para as subvencións, bolsas,etc.

7.- En que pensaches na túa primeira competición, como te  sentiches?

A miña primeira competición foi unha Copa e daquela eu era tambor. Sendo honesta estaba un tanto nerviosa, non levaba moito no equipo e tiña medo de non ser capaz de marcar o ritmo correctamente e estragar a competición. Aínda que á vez sabía que se iso pasaba elas, non ían culparme no máis mínimo. Ao final pasámolo ben pero hai que admitir que foi un pouco desastre, o tambor non soaba apenas debido a que se mollou e nunha das regatas saímonos da nosa estaxe (nas regatas hai varias "estaxes" que son unha zona marcada con boias da cal non se pode saír, se non o barco queda descualificado). A pesar deses inconvenientes pasámolo xenial e é un recordo que sempre terei na miña mente, aínda me acordo que era uns 200 metros (as competicións poden ser de 200, 500 ou 2.000 metros) ).

8.- Como organizades as viaxes ás competicións?

A organización das viaxes é algo que depende bastante da competición. Se é preto de aquí e é só de pasar un día, adoitamos alugar un bus e ir todas xuntas; en cambio, se a competición é lonxe e son varios días adoitamos usar os coches indo catro en cada un. Por exemplo, nuns días vai ser o campionato español de 2.000 metros en Sevilla e imos ir en coches. Logo en canto á hospedaxe e comida, para as que son só un día ou levamos a nosa propia comida ou reservamos nalgún restaurante próximo, dependendo da situación. Se é de varios días a xunta directiva e algunhas padeeiras que se ofreceron voluntarias buscan onde podemos comer e durmir e encárganse de reservar, tamén reservan o bus para as viaxes curtas.

9.- Que obxectivos tes ti e a asociación para ou futuro?

Ao meu parecer os obxectivos da asociación tanto como os meus son bastante similares. Obviamente o primeiro é a melloría do grupo de padeeiras, todas queremos o ben común e que poidan sacar o mellor deste deporte e equipo tanto física como mentalmente. Logo para as nenas e neno que axudamos pois o bo das medallas gañadas é que nos permiten acceder a bolsas deportivas que poden axudarnos moito e por tanto queremos o mellor. E as nosas incribles padeeiras e adestrador tamén queren gañalas para nós. Tamén buscamos visibilidade para a xente con cancro de mama. Hai moi pouco estudo sobre o tema e moita xente cre que despois de todo o proceso que pasan simplemente non poden cambiar os males que quedan, pero é falso. Esas secuelas poden eliminarse ou reducirse con axuda e con deporte controlado e por iso tentamos carteis e as nosas redes sociais para que a xente se dea conta do que son capaces e que se alguén está a pasar ou pasou un cancro de mama, saiba que ten aquí un grupo que estará moi feliz de recibila. Un obxectivo un tanto máis próximo é a competición que haberá en agosto en China, para esta tes que ser seleccionado individualmente e obviamente gustaríanos poder asistir a algunha de nós, e cantas máis podamos mellor. E, por último, por supostísimo, continuar sempre xuntas apoiándonos.

10.- Recomendas este deporte? E se eu quero comezar, como fago?

Sen ningunha dúbida eu recoméndolle á xente este deporte. Non só é moi bo fisicamente, tamén che permite desconectar un tanto e iso axuda moito, ademais como persoa que adora o mar podo dicir que estar así na auga ás veces cando chove, outras cando vai sol, outras á tardiña... é precioso e sénteste de conto. Honestamente é incrible, hai días que estou amargada e non me apetece ir adestrar pero unha vez estou aí é como desconectar do estrés e entre o deporte e o equipo tan bonito que teño, acabo saíndo cun sorriso. Non é só o deporte é tamén a xente que forma parte deste, e eu estou moi agradecida a todo o meu equipo e a moita outra xente que coñecín grazas a este deporte. É como ter outra familia que te apoia, te quere e demóstracho. Se alguén ten interese en coñecer ao noso equipo, Bolboretas, para formar el, hai varias maneiras. Temos un número de contacto, 643 461 017, un correo, bolboretascoruna@gmail.com; e tamén contamos cunha páxina web, www.bolboretas.es. En caso de non querer formar parte pero si apoiar, tamén temos redes sociais que calquera pode visitar e ver un pouco máis o que facemos e como somos, bolboretas.es.

11.- Moitas grazas, Noa, por atendernos e responder as nosas preguntas. E moita sorte para as Bolboretas, sodes un exempo de vida.

Grazas a vós, Leo e Brithany, pola entrevista. Espero que vos gustase!

Fálame da emigración

Os pasados 4 e 11 de abril tivemos un encontro coa colaboración da Fundación Obra Social Abanca e o Centro de día Frama. Remedios, Francisco e Pancho contáronnos as súas historias da emigración e ao mesmo tempo a rapazada contou as súas historias familiares en torno á emigración. Foi un encontro marabilloso. Grazas!!!!

Aquí tedes un petisco: 

 

Estas foron as dinámicas seguidas: 

Dinámica do 1º encontro:

• Proxección breve 10" de fragmentos do documental "América o el Shangai", para introducir e entrar en materia.
• Presentación dos maiores participantes, e exposición das súas historias de vida: Francisco, que emigrou a Noruega e despois a Inglaterra, moi involucrado co Centro Galego de Londres, Remedios, dunha familia de 14 irmáns que emigrou a Venezuela embarcada ela soa con apenas 16 anos, e Pancho que emigrou a Arxentina.
• Diálogo e debate, incorporando a participación do alumnado, abrindo unha quenda de preguntas.
• Proposta de traballo escolar ao alumnado para que investiguen acerca da súa propia historia familiar, explorando os seus vencellos coa emigración.

Dinámica do 2º encontro:

O alumnado expón os resultados do seu traballo escolar e as súas historias da emigración. No caso de alumnado migrante, expoñen as súas propias historias de vida, fotografías, documentación, etc... 

Traballo conxunto entre alumnado e persoas maiores por grupos, nos que debaten sobre os seguintes temas e despois facemos unha posta en común

• Motivacións para emigrar: que motivacións identificaron nos relatos dos maiores e nas historias persoais do alumnado. 
• Principais dificultades que deben afrontar as persoas que emigran. Beneficios da emigración para as persoas que emigran, aspectos positivos. 
• Comparar a emigración galega coa inmigración a Galicia ou a outras partes do mundo, especialmente se hai alumnado inmigrante na aula: aspectos comúns e diferenzas. 
• Causas dos fenómenos migratorios: por que Galicia emigrou con tanta intensidade? Impacto da emigración no país receptor e no país emisor da emigración

 

Visita á Domus e ao Aquarium Finisterrae

 O xoves 27 de marzo xunto co alumnado de PDC visitamos a Domus e o Aquarium Finisterrae da Coruña. Tivemos unha mañá de sol fantástica. Aproveitamos moito a mañá e serviunos para aprender, divertirnos e convivir. Pasámolo xenial!

 

Andorra

 Como as compañeiras e compañeiros de 3º están de viaxe en Andorra, o alumnado de PDC fixo esta presentación sobre o país. A ver se vos gusta!

 

Exercicios de repaso

 

Aves de Galicia

As nosas compañeiras e compañeiros do Eusebio da Guarda enviáronnos unha sopa de letras sobre aves de Galicia. Con elas nós fixemos esta presentación. Que vos parece??

 

Educación ambiental

 O alumnado de 3º de ESO (PDC) fixo un roteiro polo parque de Eirís para coñecer a flora, a fauna e o contorno en que vive. 

A actividade foi dirixida por Manuel e está dentro do proxecto de educación ambiental que leva o concello da Coruña para educar, sensibilizar e divulgar a toda a veciñanza e especialmente á rapazada. 

Foron dúas horas moi entretidas e produtivas. Sen dúbida, repetiremos! Grazas, Manuel!

INNOVART 2025

O xoves día 6 o alumnado de 1º de bacharelato visitou no Gaiás o INNOVART 2025. Trátase dunha excelente ocasión para coñecer o potencial das ensinanzas artísticas, de idiomas e deportivas que se ofrecen en Galicia, xa que conta con material expositivo e actividades interactivas de: arte dramática, artes plásticas e deseño, conservación e restauración de bens culturais, danza, ensinanzas deportivas, idiomas e música. Houbo tamén concertos, conferencias e espectáculos escénicos.

Unha mañá fantástica!!!

 

Visita ao MUDITEL

O luns 10 fomos de visita ao MUDITEL (Museo didáctico de telecomunicacións. Este museo está moi cerca do instituto e non o coñeciamos. É unha pequena xoia pois amosa a evolución das telecomunicacións ao longo do tempo. Neste caso foi Félix o noso guía, hai que ter en conta que son persoas xubiladas de Telefónica as que abren e ensinan o museo.

É percorrido pola historia da telefonía e das telecomunicacións dende Graham Bell ata a fibra óptica, explorando os equipos e dispositivos que foron dando servizo a través do tempo ata a actualidade e que aínda se atopan operativos. 

Trátase dunha visita dinámica na que, a través de demostracións, puidemos coñecer en primeira persoa o funcionamento de diversos elementos históricos que abarcan todas as disciplinas das telecomunicacións vencelladas ao servizo telefónico, como telégrafos, terminais telefónicos, centrais, cables ou radios.

 

Torneo de debate da Fundación Barrié

 O alumnado de Oratoria de 3º ESO participou no VII Torneo de Debate da Fundación Barrié. O equipo formado por Daniela, Noelia, Mabel e Hugo fixérono xenial. Gañaron dous dos tres debates e conseguiron 291 puntos. Eran 40 centros seleccionados de máis de 150 solicitudes presentadas por centros de toda Galicia.

Moitos parabéns! Estamos moi orgullosas de vós!!!!

A Candeloria

Aquí podedes ver os traballos que preparou o alumnado de 3º PDC para lle enviar ao alumnado do Eusebio da Garda. A ver se son quen de resolver as tarefas. 

Gabija preparou: 

 

 Brithany preparou: 

 

Naiara e Nicoll fixeron: 

 

 Fran ideou: 

 

 Martín e Leo prepararon: 

Hugo e Izan presentan: 

NORTE CINEMA DIVERSO

 Outro ano máis tivemos a visita de NORTE CINEMA DIVERSO. Esta é a 3ª edición do festival e do 20 ao 22 de febreiro no teatro Colón terán lugar diferentes actividades coa proxección de diferentes curtametraxes e películas.

O noso IES participou un ano máis no NCD Educa. O alumnado de 4º da ESO puido asistir á proxección de 5 curtametraxes e un coloquio a continuación. As dúas horas souberon a pouco pois tivemos que cortar o debate pola falta de tempo. Antes da erupción, O moble das fotos, Pancarta, A ponte, Leo e Un lugar partido e son os títulos que se proxectaron. 

A continuación Fito (Asociación Palestra LGTBI+), Paco (Fundación 26) e Paula (Comité antisida Casco) explicaron e responderon as dúbidas e preguntas da rapazada que demostrou a sensibilidade e preocupación sobre todo o que hai arredor da diversidade sexual.

Estade atentas e anotade as datas: 20, 21 e 22 de febreiro no Teatro Colón.